《金田淘事件簿》之臭屁殺雀事件


舊文一貼,相信是我唯一一篇「小說」了,原文始於04年10月。

以下是一個bedtime story,時間地點隨意,主角係一隻獅子同埋一隻兔仔,兔仔走過獅子食咗佢?係咁簡單我就唔駛講啦。

事緣係咁嘅,一日天氣非常好,藍天白雲綠水黃花青草,兔仔喺度隊緊草,sorry,係食緊草,見倒獅子1號伸個懶腰,唔覺意責親隔離隻獅子2號,佢「哎呀」叫咗出嚟,mark(3)大個口之際,一隻雀仔唔覺意跌落去,口一合,隻雀瓜咗。獅子2號唔知乜嘢跌落嚟,再開口睇吓啦,隻雀轆去獅子1號面前,1號隨手一拈,又有早餐落肚。兔仔睇倒d咁嘅神乎奇技,當堂佩服到五體頭地,直情想拜佢為師,完全唔記得自己係唔食雀嘅喎。1號食飽離開大隊似乎有所行動,莫明嘅勇氣驅使兔仔接近佢。嗱嗱嗱!係呢個point喇,記住!兔仔已經「死」咗。I repeat,兔仔已經「死」咗。

可能係劇情有心造就,獅子仲未瞓醒,喺神嘅祝福底下,佢見倒眼前呢pet(6)白雪雪嘅毛,居然冇心哽落去,仲問聲兔仔「食咗飯未呀?」呢個時候,奇怪嘅事情發生喇,兔仔最自豪果條白雪雪嘅尾度無啦啦出現一個金環,獅子見狀又話「喂,你咁潮嘅?」兔仔生平都係走嚟走去做吓d two fight six嘅角色之嘛,估唔到有獅會咁在意自己喎,個環又好似有磁力咁不斷吸佢埋去獅子度。佢心諗:「唉!死就死啦。」就就同獅子講「請問……我可唔可以跟你學……呢,你頭先嗰招呢?」獅子r晒頭,但同人講完嘢佢都係仲未瞓醒家嘛。咪話「你鍾意咪學到夠囉。」

————————————————————————————————

以下時間請嚟資深貓頭鷹智者O博士:
O博士:good night everybody,我個名叫O博士,一聽個名就知係嗰隻博學多聞、學庫五車、上天下地、無所不知、無所不曉、你人腦諗得出嘅任何低層次問題我都答得倒嗰種驚天地泣鬼神嘅猛人嚟架啦。
淘:er……神可唔可以造一塊佢自己舉唔起嘅石頭出嚟?
O博士:呢個問題設計有問題,我識答不過不屑去答,而且我相信你嘅理解能力太差唔能夠明白……(下刪百字)
淘:……咁我幾時會中六合彩?
O博士:你中嗰陣你咪中囉。要知道,有時並唔係你想中就會中或者你唔想中就會唔中,如果你想中你首先要買,如果你唔買又點知唔中。冇理由你唔買又中,但絶對有理由你買都唔中……(下刪千字)
淘:er……咁金環到底係乜呢?
O博士:呢個問題我識,i mean,我認為值得教精你。傳說中嘅金環笨唔係浪得虛名嘅,據講係每一百幾廿年先出現一次,成因係強大嘅意念造成類似宇宙射線沖擊氮質子,從而產生化學作用,引致……(下刪萬字)
淘:即係特異功能大口環?
O博士:唔係。正確嘅學名叫做「傳說中百年難得一見亦正亦邪超級能量魔法x環」,出現喺耳就叫傳說中百年難得一見亦正亦邪超級能量魔法耳環,出現喺肚臍就叫傳說中百年難得一見亦正亦邪超級能量魔法臍環,至於出現喺乳咯喎,咪叫傳說中百年難得一見亦正亦邪超……
淘:得喇。你唔好再超我喇,唔該。
O博士:由於製造者不自覺嘅意念,金環入面包含一d動物界到而家都未能完全了解嘅巨大能量,據聞可以為擁有者帶嚟幸福,同時亦可以帶嚟災難,就睇係咪用得其所喇。至於佢嘅用法呢,首先,係要用個腦諗,用心感受,再用手……
淘:大概un喇,多謝博士,麻煩返入去後台。
O博士:我未講完架,兔仔同獅子嗰單嘢我都有追,兔仔喺嗰個moment唔係phsically死咗,而係因為對獅子嘅……
淘:secure,拉閘,放狗。

————————————————————————————————

由於攝影師嘅手腳有d慢。鏡頭pan番去一獅一兔,已經係冬天落緊雪……獅子住嘅地方會落雪?睇故唔好駁故啦唔該。獅子一口咬甩咗兔仔條尾,唔多覺兔仔有掙扎,死咗?熱辣辣紅bob bob嘅血流落白雪雪o既毛,再一嘢一嘢咁滴落地,雪花飄散,沉積,紅色滲透白色,直情好似豆腐花溝紅豆沙咁。嗱甩出嚟條尾仲曉郁吓郁吓添,問你死未?野鴨甲:夠喇,一條尾死得兔咩?乙:誇張,兔仔冇血小板架?

ok 唔鍾意睇罷就;

又講番幾個月前,獅子仲係一如以往嘅懶洋洋,不過懶之餘人哋仍然叫佢做萬獸之王。佢份job幾好做架,仲細ahma,唔駛養家。得閒除咗食飯瞓教大小叫兩聲之外就又係食飯瞓教大小同叫多兩聲。但係,除咗人之外,獅都有好多係犯賤嘅。但凡春夏期間都有唔少獅子乸主動走嚟flirt佢,鬼叫佢懶得嚟又真係幾有創意,粗心得嚟又有少少温柔,唔cool嗰陣又有d愛心,理性之餘仲有丁dur霸氣咩。嗰招連消帶打殺雀事件其實好有可能係佢嘅獨門武功。你諗吓喇,無端端隻雀點會飛飛吓跌落嚟啫。一定係佢一邊扮唔覺意打親隔離果個分散我哋注意力再一邊放暗器嘅。係喇,一定係咁。而且,佢收咗兔仔呢條o靚之後,仲係非常之有大師風範,根本一d師傅嘅架子都冇。

我咁講梗係有原因啦,話說當日獅子講完「你要學咪學到夠」呢句之後又返咗去瞓,到清醒少少。又有d口痕同肚餓,mark(3)大眼見倒隔離有堆白毛,再聞吓有d午餐+++肉+++嘅香氣,佢又想一啖咬落去……hehe,咁嘅時候,梗係見倒個金光閃閃嘅環啦。不過如果唔係啱啱咬落去嘅時候個金環攝住咗佢隻爛牙痛到佢冇晒mood,相信佢依然係會食咗眼前呢餐嘅。

————————————————————————————————

一個人自言自語有d悶,本來想好似d劇集完咗咁請d主角上嚟排排坐,食粉果。但只係揾倒亞獅子,兔仔contact唔倒。anyway,聽d工作人員講(又係好行咁)話執倒兔仔本日記喎……現實中有咁多兔寫日記嘅咩?佢用人唔係用兔嘅邏輯同文字架下話?唔想sai錢揾translate呀。言歸正傳,以下一連幾集就請獅子入嚟陪大家睇日記啦,實q,鎖實個籠未?

淘:獅子你好。^^
獅子:wow~
淘:……咁開始喇,揭去我比較關心嗰頁啦,有喇,你個名第一次出現嗰日。
獅子:wow

x月x日 晴 \(^v^)/
今日好開心呀,我見倒隻高獅,見識倒天下第一嘅驚世絕學。佢一個唔覺意打親隔離……食咗隻雀落肚……我最自豪果條白雪雪嘅尾度無啦啦出現一個金環……(淘:重覆又重覆,不贅。)嗯,既然係咁,我唯有先將打破世界紀錄以最短時間兔仔跳完成條萬里長城嘅宏願放低,拜咗獅先啦。

中略……

獅傅又去返瞓教,咁我又抖陣時,瞓瞓吓,佢忽然!!佢忽然錫我呀。(淘:應該係想食你,獅子可?獅子: wow)從來未試過咁架,我覺得金環度有陣暖流流向身體,直升上腦,搞到好似發燒咁。獅傅見我面都紅晒,就問我係咪病,叫我就瞓多陣,仲話最多因間叫醒我添。我見佢眼濕濕好似有d難過咁,真係好人。(淘:牙痛咋啩)醒返嘅時候,我眼前已經多咗塊肉,獅傅仲話「食啦,呢d唔係度度有架。」aiya,金環又熱喇,點算?唯有借頭借路再次表明來意跟佢學嘢啦,佢扮晒無辜恍然大悟咁樣,he he,佢真係謙虛。

我雖然唔食慣肉,但見佢……

中略……

淘:話時話,兔仔到底係男定女?
獅子終於開聲:我點知。
淘:ah,你件蛋散,識講人話就早響啦,請咗你上嚟都仲要我自言自語。
獅子:哼,你又冇問。
淘:咁兔仔對你嚟講係咩呢?
獅子:兔仔囉。
淘:我夠知咯。
獅子:知你又問?
淘:我指你同佢嘅關係呀。
獅子:獅子同兔仔囉。
淘:我夠知咯。
獅子:知你又問?
淘:我可唔可以打你?……算。

x月x+1日 晴 \(@^.^@)/
我打算釋放我靈魂裏面嘅獅子出嚟,獅傅教我要揀d殘廢門(即老弱傷殘)嘅動物嚟追,好努力之下比我追倒隻啱啱出世企唔倒起身嘅羚羊仔,我出盡全身之力咬佢,(淘:3級?4級都嚟緊,呢段太殘酷,cut。)佢呻吟咗幾聲,一睡不起。好內疚,我覺得自己好殘忍,忽然一陣無力感侵襲,我腳軟坐咗落地。如果唔係兔天生係冇淚腺嘅話,我諗我已經喊咗出嚟。獅傅埋嚟食咗隻羊,見我仲係吽吽哋,一言不發就擔起我後頸,返歸。佢好温柔呀,知道我哋最怕比人稱起耳仔,識得揀後頸,我冇拜錯獅。弊!個金環又……我諗我要好好學識習慣佢嘅能量先得。成日病點學藝呀。話時話,個金環到底點嚟嘅呢?

淘:兔仔咬得死隻羊?
獅子:關佢咩事?隻羊先天不足。
淘:你咁叻知道拎兔仔耳佢會痛嘅?
獅子:咬條頸d獵物先會窒息,況且耳仔咁削邊有肉食架?
淘:……哦。

————————————————————————————————

無無聊聊,再八卦番人哋本日記先。

x月x+2日 晴 ﹝^_^;﹞
我發現咗獅傅一個大秘密呀,點好呢,話唔話比佢知好呢?好啦,靜雞雞寫低佢都唔怕啩。就係……就係佢原來經常便秘同放屁,唔知係咪食得生肉太多呢?(淘:哈哈;獅子:……)哈,前兩日明明冇事架,今日成日不停咁放。(淘: 梗係,你拜師前佢咪啱啱行動完囉^^)不過呢,我發覺獅傅係唔會响d陌生人面前放架,怕冇面啩。佢梗係當我自己人頂喇,好warm呀。聞聞吓,其實d屁都唔係咁臭啫。

其次,我已經慢慢適應咗隻金環嘅力量。奇怪嘅係雖然佢係扣實我d肉,我一d都唔覺得唔舒服,反而因為佢嘅力量,令我覺得high high哋,ting日又充滿希望咁。

淘:其實隻兔仔係咪咁豬兜架?一個人一日可以忍幾多屁喎,見人一陣就話啫, 成日對住你點忍呀?獅子可。
獅子:不當預設。
淘:係喎,我應該問一隻獅可以忍幾多屁喎,見其他動物一陣就話啫,成日對住兔仔點忍呀?
獅子:你預設咗有屁忍住,事實可能係咁啱冇得放。
淘:真係咁啱?
獅子:我話可能啫。
淘:你啱。

x月x+3日 多雲 ﹝。_。﹞
……今日臭到隻雀跌落樹……

x月x+4日 雨 ﹝。_。﹞
……今日臭到朵花謝咗……

x月x+5日 雨 ﹝。_。﹞
……今日臭暈咗隻大笨象……

中略……

淘:嘩!你有冇誇張d呀?
獅子:唔得牙?
淘:得,你咁放法我吹你唔脹嘅~
獅子:吹唔脹咪就得囉。
淘:係喎,唔通你招打雀絕技……
獅子:(未開聲講嘢,說時遲,那時快,but~~~~~~)
淘:咦eeee~散呀。

————————————————————————————————

淘:晚安,mic……咳咳,ah唔該。
獅子:晚安,食咗飯未?
淘:(硬係覺得怪怪哋……)
工作人員甲經過:今朝清理過個籠,有si……
淘:得,get倒,唔怪得心情靚啦。
ok,一直都係睇你點臭,jump吓先:
第十日 晴 o﹝^_^﹞o
……朝早幫獅傅捉雀仔……夜晚幫佢執乾草……
第十一日 晴 o﹝^_^﹞o
……幫佢鋪床……聞佢放屁……
第十二日

中略……
第三十日 雨 o﹝^v^﹞o
……近來嘅日子過得前所未有咁充實,雖然獅傅表面上對我做嘅事都唔多滿意,但係我覺得佢其實係好感激我架。憑咩覺得?覺得咪覺得囉,金環都認同,唔係佢點會比源源不絕嘅力量我呢?獅傅一定係恨鐵不成鋼啫,佢對我真係好。哈,由唔知幾時開始,我本日記好似變咗拜師紀念冊咁,乾脆由嗰日開始改國號把啦。er,好似唔係叫國號,叫咩呢?我個腦咁細,裝唔落咁多詞彙架噃,是但啦,總之拜師日就係我世界嘅第一日。
淘:兔仔嘅日記頁頁都係你,悶唔悶架?
獅子:佢兔品咁差,都冇人chump佢玩,唔寫我寫邊個?
淘:你對住佢都係咁講架?
獅子:唔得牙?
淘:咁佢點差法呢又?
獅子:……
第三十五日 晴 o﹝^_^﹞o

第四十日 晴 o﹝^_^﹞o


淘:e~ 呢版好似有d新意喎,起碼唔係晴天ah。;p

第六十三日 雷雨 。\/。
……黃昏時照常去執d乾草,返嚟嗰陣見倒獅傅同隻獅子乸言談甚歡,我認得佢,喺我世界開始之前曾經想dap我,好彩比我跳甩咗。佢個獅子頭亂到好似幾年冇洗咁,豬扒!隻眼細過隻蟻,豬扒!個口大到擺得落隻象,仲豬扒!最離譜係d指甲呀,綑哂黑邊,真係豬扒中嘅豬扒!!!正想行開避避,獅傅佢?!獅傅佢竟然biribere咁放炮仗?!!有冇攪錯,你居然喺塊豬扒面前放屁?仲係一連串放咁多個又響又臭嘅添。金環突然發出閃電,我以為佢會打塊豬扒,點知連同閃電帶嚟嘅電流係流入我個身,辛苦到暈。幾經波折捱完痛嗰陣,扮唔覺意問獅傅點解喺佢面前放屁,佢話「你同佢有分別咩?」今次金環發出嘅已經唔知係咩能量,我冇晒知覺。我諗獅傅都唔會睇倒我眼紅紅。

————————————————————————————————

第六十四日 陰雲密佈 (._.)
……朝早幫獅傅捉雀仔……夜晚幫佢執乾草……

第六十五日 陰雲密佈(._.)
……幫佢鋪床……聞佢放屁……

第七十日 雨 (._.)
……獅傅生日,我整咗份禮物比佢,本來想開開心心陪佢玩一日嘅,不過佢心情似乎麻麻,唔知係咪我又做錯d咩呢?金環呀金環,你話我知啦……

淘:兔仔都幾犯賤過喎。
獅子:語意曖昧。
淘:明知一隻獅子嘅心目中點都只有另一隻獅子,冇可能係隻兔仔架啦,仲理你做乜?
獅子:獅子乸都好煩,不過你仲煩。
主持之淘立(3)起摺凳就o趙落個籠度:ah,你條木(1)契,咁寸?!
工作人員甲:冷淨d,on air 緊架。
淘深呼吸一下:得,繼續。

第九十九日 傾盤大雨 ﹝T_T﹞
……學獅咁耐我始終都戒唔甩隊草呢個壞習慣,由於身體構造問題,必須將未消化完嘅草排出嚟再食番。話哂動作有d不雅,平時我會等獅傅瞓咗喱埋先咁做。 點知,呢個秘密連一百日都守唔倒,比佢發現咗。佢一開口就係三個好貼切嘅字─「食屎兔」。剎那間,我嘅味覺同風都停咗,耳仔旁邊不斷重覆呢三個字,金環嘅磁力消失,隨之而嚟嘅係直達神經嘅刺痛,我一邊發出無意義嘅依依哦哦聲, 對眼望向獅傅再穿過佢。忽然間我好懷疑呢個仲係咪我熟悉,溫柔嘅獅傅呢。唔知,到有返少少知覺嗰陣,身邊嘅境物都唔同晒喇,我唔知而家係朝早定係黃昏,亦都唔知自己喺模糊嘅時候跳咗去邊。獅傅會唔會因為唔見咗我而擔心呢?我係咪應該跳返番去呢?返到去佢又會唔會再叫我咩咩兔呢?好亂呀……

淘:你有冇人性架,你知唔知咁樣好hurt兔架?
獅子:我都唔係人。
淘:點解你叫佢食屎兔?
獅子:事實。
淘:事實往往傷人,無論你點樣將一d令人難堪嘅講法包裝成笑話,講者無心,聽者有意。到聽嘅人再分唔清你心底話同笑話之間有幾大分別,或者個笑話即係事實,甚至事實更勝笑話時,除咗眼淚,仲可以用咩嚟回應呢?
獅子:哼,小器。
淘:……咁你有冇追番佢?
獅子:咪煩,你自己睇啦。。
淘:……

————————————————————————————————

第一百日
……我揾唔番條路返去, 唔知獅傅做緊乜呢? er…… 今日到底係晴天定陰天呢? 我係開心定係唔開心呢?……

第一百零一日
……獅傅叫我咩咩兔我咁難過, 如果我叫佢做臭屁獅佢會點呢?……

第一百零二日
……諗落獅傅嗰招打雀功夫真係好犀利。 其實佢對我好好o架……

第一百零三日
……或者我真係太依賴獅傅喇,佢唔喺度,我好似冇哂寄託咁嘅。金環曾經比過咁多力量我,但而家除咗整痛我之外就乜都冇,我好想除咗佢但係又除唔倒……

淘:哈,喺呢d情況之下,唔係應該出現隻對佢好好嘅灰兔呀,諗吓點樣覆焯呀,或者離開傷心地咁嘅咩?
獅子:個故仔你作嘅,你問我?
淘:你比少少創意得唔得?
獅子:佢冇咗我唔得囉,ok?but~
淘掩鼻:好臭!原來你知架下話?咁你仲唔搵兔?
獅子:屋企個屎坑唔見咗,你會搵定係換過個呢?
淘:屎坑?!
淘又想郁手,工作人員甲拉住佢。
淘怒吼:唔好拉住我,我自己識坐番好。

第一百九十八日
……獅傅你喺邊度?係咪已經唔記得咗我喇……

第一百九十九日
……ting日係我生日,我希望見返獅傅……如果世上有神,求吓祢將我變成一隻獅子啦,就算只係一日都好……

第二百日 晴 ﹝﹝ \﹝^v^﹞/ ﹞﹞
……奇蹟呀,我居然返到去我拜獅嘅地方呀。你估我揾倒d乜,地下條雀仔尾?仲有呢?雀仔尾上面有個黑黑哋似曾相識嘅物體?唔止呀,我喺舊石頭度見倒獅傅嘅留言呀!!!「生日快樂,祝願望成真。」開心死喇,個金環嘅力量一下子返晒嚟呀。仲未算呀,當我擰轉頭一望,佢!佢!佢企咗响度呀,我同佢講聲多謝,佢仲話「唔駛客氣」。我好幸福呀,多謝你呀,9527。

淘:你居然記得一個屎坑嘅生日?
獅子:i see蕉之嘛。
淘:ic蕉?咁先進。
獅子:除咗蕉,個屎坑喺d紅蘿蔔呀,草呀,菜上面都mark低哂,咁啱睇倒咋。
淘:咁你又點解揾佢?
獅子:咁啱行過之嘛。就算係揾都係因為我習慣用呢個屎坑,冇錢買第個,佢又未爛,唔好sai ahma。
淘:fuxk……

————————————————————————————————

我發覺同呢隻獅子傾咗幾日,我已經非常之唔好老脾,破壞晒我嘅形象,都唔知兔仔點頂佢架。

第二百零一日 多雲 ﹝。_。﹞
……朝早幫獅傅捉雀仔……夜晚幫佢執乾草……

第二百零二日 多雲﹝。_。﹞
……幫佢鋪床……聞佢放屁……

淘:點解成日都係咁架?copy & paste架?
獅子:唔好睇ah笨。
淘:你出嚟,同我隻抽,打贏放你走。
獅子:我唔打女人架。
淘:妖,咁你出嚟比我打,打你唔死放你走。
獅子:出咪出。

淘「毫無懷疑」佢咁順攤咁開始o趙……喺一輪摺凳攻擊底下,獅子都冇還手。最後佢慣低咗,仲喺身上跌咗一條雀尾連埋舊黑色嘅物體出嚟。

淘:call黑車把啦,冇人可以喺接完我嘅七殺拳,破軍腿,貪狼凳之後仲企得番起身嘅。

就喺黑車嚟到抬咗獅子走之後……

淘「忽然醒起」:弊,睇咗咁耐日記,都未去到雪地咬甩尾嗰場。仲有,兔仔明明同佢一齊,點解當日我請獅子上嚟嗰陣揾唔倒佢嘅?呢舊黑mungmung,圓碌碌好似戒指咁嘅又係乜?唔係喇,悶就悶d,再揭吓先:

第二百四十九日 陰晴不定 ﹝。_。﹞
……朝早幫獅傅捉雀仔,佢話隻雀太瘦,我駁咀話獅傅太肥唔應該食肥膩嘢……夜晚幫佢執乾草,佢話d草太乾,我又話咁先健康,冇濕氣……

第二百五十日 陰晴不定﹝。_。﹞
……幫佢鋪床,佢話唔夠整齊,我話你橫掂都會瞓亂……聞佢放屁,獅傅嘅屁點解越嚟越難聞嘅……

第二百五十一日 狂風暴雨 —
……近來嘅日子同以前嘅表面上一d分別都冇,但係感覺好唔同,以前金環比過幾多力量我,就好似反噬咁攞番幾多,我好攰呀。每次駁獅傅咀佢都冇乜反應,我講負氣說話佢都好似聽唔倒,佢好似一d唔開心都冇,反而我因為自己咁唔理獅感受嘅講法就有d內疚,亦都因為佢嘅冇反應而唔開心。我知道對佢嚟講,我乜都唔係,佢對路人甲反而仲客氣過對我……諗諗吓又無無聊聊玩吓條雀尾,我發覺倒嗰舊黑色嘢原來係……

淘:喂,寫到呢度就冇咗?我要睇大結局呀。

呢個時候,工作人員甲入嚟話:亞淘,獅子未死呀,佢喺送院途中走甩咗……

淘「驚訝」狀:what?詐死?kit kit kit,我諗住做d反應等大家緊張之嘛。唔驚,雖然我表面上低低能能, 實際隨時變身高人。殺破狼三式都預留殺著,擺明放佢走架啦。唔止咁,仲一早叫人喺佢身上放咗追踪器添。時間啱啱好,外景組ready 未?go go go。

————————————————————————————————

獅子走咗,隊crew又未track 倒佢哋呢段空檔,你唔好當我咁懶乜都冇做過喎, 實情仲爭少少嘅啫。唔講咁多,先請人腦勝過豬腦,ah,係豬腦勝過人腦……aiya 死喇!我講緊咩呀?i mean,係iq高eq高乜q都高嘅女科學家佛羅拉出嚟講幾句。

淘:科學家你好,請你記住,你係有3句對白嘅。
佛羅拉:吓?
淘:第一句。
佛羅拉:哦。
淘:第二句。
佛羅拉:舊黑色嘢嘅成份已經分解,主要係氮氣,二氧化碳,硫化氫等,同一般動物排放嘅氣體類同。
淘:即係屁嘅固體啦。
佛羅拉:可以咁講。
淘:得喇,四句喇,比多你,可以返入去喇。

變身金田淘出場:よし、謎は全て解けた!(好,謎底已經解開喇!)

到底雀仔係點死嘅呢?就等我喺度一連幾日、抽絲剝繭咁同大家replay replay 再 replay到條片爛咁嚟到睇真d。你哋如果仲記得,O博士講過金環「係每一百幾廿年先出現一次,成因係強大嘅意念造成類似宇宙射線沖擊氮質子,從而產生化學作用,引致……」你哋係咪同我一樣,一直以為金環只有一個呢?但係我哋喺條雀仔尾上面發現嘅物體,只要將佢油成金色,就變成一個金環,同雪地嗰幕兔仔條尾嗰個一模一樣。所謂一百幾廿年出現一次,應該係指嗰個擁有製造金環能力者─獅子,而佢製造金環嘅意念……冇錯喇,古有折墮真人折氣定江山,今有寸爆獅子便意生金環!嗰種意念就係谷si……上腦嘅便意!!!雀仔因為條尾忽然出現金環令佢一時意亂情迷,不知所措而跌落嚟。 而當兔仔條尾出現金環嗰一刻,就注定佢同樣成為獅子嘅獵物,注定佢嘅世界要圍住獅子轉,不能自己,即係死緊,死梗,死咗,etc。兔仔成為獵物嘅原因並非無差別,而係佢有一個致命傷─死蠢!!!而呢招冇錯係獅子嘅絕技,亦係點解佢一直對個金環不表興趣嘅原因,一個獵人對自己嘅武器當然見怪不怪。最抵死嘅係佛羅拉好暗地裏咁話過我知金環除咗學名,好似仲有個common name, 叫愛情之環?錯!係叫臭屁之環,kit kit,係咪好貼切呢?

等陣,有消息?roger。隊crew好似track 倒佢哋咯喎。咁就……賣吓關子先。

————————————————————————————————

八達嶺長城:位于北京城西北80公里處嘅延慶縣境內,結構嚴謹,形勢壯觀,氣魄雄偉,係長城嘅一個縮影,亦係長城最主要嘅遊覽點之一。八達嶺長城依山勢而筑,高低寬窄不一,平均高6-7米,濶4-5米,用整齊巨大嘅城磚筑成牆體外殼。京張公路從城門中通過,為通往北京嘅咽喉。從「北門鎖鑰」城樓左右兩側,延伸出高低起伏、曲折連綿嘅萬里長城。八達嶺長城游覽區包括蜿蜒嘅長城、壯麗嘅敵台、居庸關同關溝內嘅勝跡。居庸關係從北面進入北京嘅門戶,有一夫當關,萬夫莫敵嘅氣勢。居庸關長城建筑喺一條長達15公里嘅山谷中間,兩旁山巒重疊,樹木蔥郁,山花爛漫,景色瑰麗,早喺800年前的金代,就被列為燕京八景之一,稱為「居庸疊翠」。

直昇機嘅fark(6)fark(6)fark(6)fark(6)聲~

淘:唔該資搜組。係前面喇,佢哋差唔多上到其中一個城頂。兔仔抛離獅子500米左右,機司唔該飛近少少。係喇,追上去啦獅子, 兔仔等緊你架。快d快d。

淘對住headset:吓,收唔收倒音牙?揾個人試試先。
啱喇,獅子2號都喺附近,佢點解會喺附近?anyway……
淘對2號:麻煩你講吓你對獅子1號嘅感想ah。
獅子2號:佢……懶之餘人哋仍然叫佢做萬獸之王……佢收咗兔仔呢條o靚之後, 仲係非常有大師風範……不過如果唔係啱啱咬落去嘅時候個金環攝住咗佢隻爛牙痛到佢冇晒mood,相信佢依然係會食咗眼前呢餐嘅……
淘:咁兔仔呢?
獅子2號:兔仔?隻隻都一樣架啦,ok 好食嘅~
淘:咦,你隻爪上面嗰個閃閃吓嘅物體……咁熟口熟面嘅……點都好啦,總之個mic冇事,1號又差唔多追倒兔仔喇,聽吓先:

攝影機急速掃過天空,太陽,雪山,雪地,飄雪,城牆,城頂,一獅一兔,lock, focus,zoom。

獅子一路追一路喘氣一路大聲叫:ha……ha……喂,唔好嬲啦。
獅子:最多我請你睇亞淘個節目喇。(淘: 廣告時間 ^^)
獅子繼續追:ha……最多我以後唔駛你捉同埋食雀喇。
獅子:最多我唔駛你執草喇。
兔仔並未停低,但忍唔住開口:放過我啦,好嗎?
獅子:好,一路跑一路講咁多嘢好攰架。
兔仔似乎下定決心:放過我啦。
獅子:咁算啦。
佢哋再跑咗好幾年咁耐……
獅子:你仲嬲我牙?
兔仔:信唔信都好,呢種點都唔叫嬲。
獅子:咁叫咩呀?
兔仔雙眼通紅,越嚟越激動:嬲你?我只係一隻唔覺意掂倒你你都會縮開嘅路人甲咋,有咩資格嬲你呀?你對我嚟講都只不過係一隻不相干嘅觀眾乙之嘛,值得我嬲咩?
獅子:……

此時佢哋嘅距離去到只係攝得落1個5蚊……

兔仔:放啦,我好攰呀。
獅子:停低抖吓囉。

距離又回復到2個身位……

兔仔終於急煞,spot turn:你唔明。你知唔知你好殘忍,我好辛苦。
獅子r晒頭:你跑到攰咪出聲囉,我又唔係唔比你抖。
兔仔:唔係身體嘅攰呀,係精神嘅攰。要嬲你,喺我上次走嗰100日就已經嬲夠啦。我以為不帶任何期望,做你一個普通朋友係好容易架,點知……我根本擺脫唔倒個甩色金環,d肉開始爛,每次諗起你放完屁連對唔住都唔會講聲,我就覺得自己犯賤。當我見倒死咗隻雀仔個退咗色嘅環嗰陣,我知道我除咗死,只有走。不如你幫吓我,一係咬斷我條頸,一係咬斷我條尾。

冇淚腺嘅兔仔開始流眼淚。

獅子:……
兔仔: 咬啦,你唔咬,到我條尾一直爛落去,只會比死更難受……
獅子就由兔仔企喺度一直喊,雪越落越大,過咗好似上帝再創造多一個世界咁耐之後……
獅子:我以為我哋一直係好朋友……
兔仔:自私!邊個得閒做你好朋友?!我再無聊,再多時間都可以選擇唔比你攝架。冇咗你我唔會,一d都唔會覺得可惜同難過,反而好開心終於可以有番自己嘅尊嚴。不過,我依然會一直祝福你,直到你揾倒隻好嘅獅子陪你,好似亞2號咪幾好囉,又係一隻獅子,又有眼耳口鼻。到時天下無不散之筵席,送君千里, 終須一別,君子之交淡如水,道不同不相為謀,你有你嘅生活我有我嘅忙碌……(越講把聲越拆,眼淚一路流到好似亞爸把聲……)

兔仔轉身向獅子疙起pet pet,show出一條爛咗都仍然白過激白mask嘅尾。
獅子:……

淘: 各位觀眾, 原來我哋之前睇嗰條片只係其中一個ending, 玩少少gimmick 又比你揀揀喇,到底獅子獅子咬兔仔兔仔邊度好呢?
1。 頸
2。 尾

本台可能會喺之後播放最多人選擇嘅結局。

– 完 –

各位觀眾晚安。 多謝收睇。

《金田淘事件簿》之臭屁殺雀事件” 有 2 則迴響

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s