Cycle 7 to Week 12 – 神醫孟煒


1月28日去沙宣道果邊睇孟煒,醫師真係行動派,好即興好急咁叫我針炙,因為仲有病人等緊兼就嚟close,呢度好唔就腳,响中環都用成9個字先到。呢日應該係針咗行間、合谷、三陰交、唔知氣海定中極定關元穴、子宮等。上網睇返原來針炙可以促排卵,不過一般要針幾次,醫師又放假喇,最快都要2月11再見,咁斷估今個cycle都係專心調理吓算。開咗10劑藥,都唔知同一隻藥食10日算唔算長,但唔想諗,信佢把啦。

另,想照輸卵管顯影,不過都係遇啱過年,冇人得閒理我,咁又下個cycle先。

唔sure何謂破卵?睇咗幅相就知,呢個post仲清楚。網上不乏呢d case,見倒大把人同自己一樣,ok啦。都唔知薯係好彩定唔好彩,雖然我唔知為乜都繼續努力,但如果佢老婆唔係我,可能唔洗咁努力都搞掂咗。

2月11日,醫師仍然係咁權威:
淘:「上次有做針灸……」
孟:「今次都要做。」
淘:「哪多久要做一次?」
孟:「你別管。」

針灸時醫師好似d高手捉棋咁,同我針完又同隔離針,跟手返嚟又同我轉針,今次針咗三陰交,又係唔知氣海定關元同子宮,加埋手側少府?見我望住佢針,又話「閉上眼晴、睡覺、休息。」

另作藥方紀錄

1月20日藥方:白芍20g 灸甘草10g 醋柴胡 9g 當歸12g 茯苓12g 白朮6g 自加生薑3片 薄荷 5g徐長卿 12g 醋香附 6g 肉豆寇 6g 補骨脂 6g 五味子 9g 4帖

1月24日藥方:三枝12g 莪朮 12g 仙鶴草15g 益母草15g 黃耆30g 玉米須30g 桔梗15g 山藥12g 蓮子12g 無胡 9g 柴胡6g 3帖

1月28日針炙加藥方:白芍30g 當歸 12g 菟蕬子 20g 柴胡 6g 茯神 12g 山藥 12g 玉米須 30g 荊芥 9g 炙甘草 10g 路路通9g 威靈仙 15g 皂角刺12g 10帖 (就係呢10帖勁過hcg同排卵藥,本來已經預備上大陸偷買穿山甲磨粉,但原來破卵仲有好多中藥可用。)

2月11日針炙加藥方:紫石英 30g 仙茅 12g *仙靈牌 12g鹽黃柏 12g 知母12g 當歸 9g 巴戟天 12g 鹿角膠 12g菟蕬子 12g 炒扁豆 9g 山藥9g 7帖

2月18日針炙加藥方:鹽黃柏 12g 知母10g 白芍20g灸甘草10g 仙茅 10g 仙靈牌 12g當歸 12g 巴戟天 12g 鹿角霜 30g 菟蕬子 12g 玉米須 20g 椒目 3g 5帖 (孕婦可服)

2月23日藥方:白芍 20g 炙甘草 10g 百合 12g 麥冬 12g菟蕬子 20g白朮9g 山藥 12g 蓮子12g 陳皮 6 g自加生薑3片 5帖 (孕婦可服)

3月2日藥方:菟蕬子 20g 阿膠 12g白芍 20g 炙甘草 10g 木香 6g 砂仁3g百合 12g 麥冬 12g艾葉3g 陳皮 6 g 黃岑12g 5帖 (孕婦可服)

3月14日藥方:麥冬 10g菟蕬子 20g 續斷 6g 白朮9g 白芍 12g 炙甘草 10g 陳皮 6 g 自加生薑3片 3帖 (孕婦可服)

*仙靈牌即淫羊藿 ß 中藥偉哥

我呢d求知欲咁強,每款到底醫d乜,都無謂問佢,逐隻藥google再對照吓呢d網站,君臣佐使唔曉分,唯有信佢囉。


7 DPO(days past ovulation):高溫36.85,胸脹似m come,勁肚痛原來唔關事。
8 DPO:體溫創新高37.35,但用綠d冇料到,左下腹間唔中痛。開始擔心係發炎多過中咗。
9 DPO:體溫回落到36.86,各種徵狀持續。
10 ~ 11DPO:各徵狀持續,以下日子都係,但體溫keep住跌,又食白果lu。
12 DPO:未瞓醒以為體溫繼續跌到36.1,原來回升到36.7,咁之前唔通係implantation dip?又充滿希望喇。
13 DPO:忍咁耐終於用綠d,有淺色線。^^ hcg係一定要著咗床先驗倒嘅。
14 DPO:綠d深咗少少,但hcg每兩三日應該double,我又成日左下腹痛,會唔會宮外孕㗎。去普通西醫度驗都係淺,佢話太早confirm唔倒,下個星期先啦。俾另一個中醫把個脈話如果係就似係女。
15 DPO:上網睇原來仲有chemical pregnancy,仲要5至6成受精卵都係咁,咁唯有一路check住bbt,希望唔好跌返落嚟,我估都有排擔心。
17 DPO:繼續活喺惶恐當中,anyway,綠d深粗喇。過咗最難果關。

Week 5:盲中中中咗上去一個中上環交界up dup招牌女醫生度,諗住寫張醫生紙排政府醫院,雖然諗住私家生,但又驚萬一要入ICU果d好甘。點知上到去原來係婦產科醫生,又係度高量體重體溫驗尿果隻,跟住話我體溫低又話要保胎又剩,又話寫紙我絕對瞓床,然後再話分泌物有少少黃似發炎,夾硬開咗d合成黃體素dydrogesterone俾我,呢位醫生不斷喺你冇問題時仲要同你分享n個例子,非常唔理人感受,就好似隻烏蝿,唔係一隻,係一炸……不贅。記得孟煒叫我唔好食合成黃體素話對胎兒有影響,問過朋友又話食都ok冇乜副作用,但因為我唔鍾意之前食完咁多hormones嘅副作用,我高低溫期差距有攝氏0.5度,加上睇埋余啓文篇文話食都未必有用。(死link,我貼去回應度。)所以都係由佢,等多一個week開大細把啦。

Week 6:某日bbt跌咗0.05度,有人好緊張,嚇到我果朝發夢小產。好在終於捱到見倒仁安盧永傑醫生,點解唔book余啓文係因為佢超忙有排都唔得閒理我呢尐新症。盧永傑俾我感覺好好,醒目、風趣、解釋清楚、專業亦有耐性。最記得佢呢幾句,我擔心宮外孕,佢話「你點解會咁諗?不過好嘅,擔心果尐通常冇事,唔擔心果尐就……」,「一個點窮嘅婦產科醫生都應該買部超聲波機嘅。」而關於bbt低呀要保胎果尐,佢話「你一滴血都冇流過好正常呀,只睇體溫唔準嘅,太多嘢可以影響bbt,我讀書時先會睇呢尐。」「念珠菌本身就住喺裏面,冇問題嘅,唔會影響倒個胎,太痕先需要treat吓佢。」然後,見倒bb心跳,總算又過一關。薯非常擔心弓型蟲問題,但我好耐冇接觸貓貓便便啦。Anyway,盧醫生都係叫我盡量唔好掂貓。就係咁,第一時間又擇埋日開刀喇。希望有得開。仲有因為我keep住食materna,佢話唔洗咁早食,不過食開咪繼續食到生囉,冇開咩藥俾我,但我唔食魚佢話可以再加多樽dha果尐。

Week 7:3月14日,孟醫師同我講,冇乜唔舒服可以唔洗再嚟喇,yeah。不過佢話睇佢當月懷孕嘅其實唔多,所以如果我生得出,真係好彩。

同事話原來仁安尐醫生出嚟搞咗檔翹康,每次產檢4百零,但每樣另計咁,其實我都唔係貴好多啫。(自我安慰中,但最後我知盧醫生冇份搞。)

Week 10:又去見盧醫生,產前驗血報告正常,照到個b比上次大咗7倍,游緊水一切正常。薯硬要話佢係同我地揮手喎。Btw,硬係覺得今次冇上次咁清楚,心跳聲每分鐘百九幾吓但好似冇咁響,諗返原來而家係照肚上次係陰超,難怪。我發覺我冇乜問題問,醫生又好爽快咁解釋完,走得6周後再見,因為week 12都要做oscar有得照ultrasound。

Week 12:好長嘅一日,朝早去母嬰健康院第一次產檢,因為朋友話即使私家醫院生,有咩意外都要入政府icu,不如一早兩邊睇留埋位。朝早8:45留到12:00先至走得,但仍然想讚嘅係我估唔到政府度都有好溫柔嘅nurse同doc,意料之外。3個幾鐘就係驗吓小便有冇血同蛋白呀、問吓家族病歷,俾醫生摸吓胸同肚,再用果枝好流嘅儀器check吓胎心跳,非本地孕婦做呢種產檢都要每次700蚊,難怪多數去私家lu,價錢又唔係爭好遠。現時本地孕婦喺公立醫院生唔包照結構嘅,超聲波則視乎情況。

晏晝去威爾斯做oscar驗唐唐,我今日先知其實去威爾斯生的話高齡可以免費做,但護士都話有quota同要親身排隊 & 多數排唔倒,去到時都唔止我一個係俾錢做。又等咗好耐,我尐血管一向極幼,護士好人出動了「飛機仔」,即最幼長管針嘴,但結果都係抽得唔知有冇5ml,好彩都做倒test跟住到照超聲波度頸皮,開頭個b好似luen弓蝦米咁,度極都度唔倒,醫生拍我個肚彈佢都唔得。要起身行吓再照第二次先take倒reading。之後多口問咗句幫我照果位Professor Leung,居然話70%係仔喎,咁信中醫定西醫好呢?我傾向西,但始終太細兜,平常心把啦。結果係低危,暫時安心少少。

Cycle 7 to Week 12 – 神醫孟煒” 有 15 則迴響

  1. 轉貼余啟文篇文:

    成功懷孕,可能令準父母歡喜若狂,但也不無恐慌──每次上廁,都擔心看見不尋常分泌﹔略感肚痛,即害怕可大可小……如果「作小產」,怎麼辦﹖

    妊娠前半期(18至24周前),陰道有出血現象,但並非小產,就是「作小產」了。

    婦產科專科醫生余啟文指出,孕婦作小產的機會不算低,最少有15至20%曾經驗流血。而現時的小產百分比,又較以往略高,因為香港婦女懷孕的年齡愈來愈高,而愈大年紀懷孕,小產的機會愈高。

    胎兒健康 也會流血

    余啟文解釋,作小產的原因,暫時醫學界仍未完全肯定。他說﹕「若胎兒不健康,孕婦通常會流血;但胎兒健康,有些孕婦亦可能流血。」而子宮頸鬆弛、子宮纖維瘤或其他病變、懷雙胞甚至三胞胎等,也有可能導致出血。

    他指出,若胎兒健康,縱使孕婦曾作小產,亦不會真的小產,同時胎兒的成長與出生,並不會因而多了問題,更不會影響將來發育。故此,有「作小產」情況的孕婦,先別憂心,應立即就診。

    婦產科醫生會為孕婦作身體檢查,及了解其病徵,大部分並會為孕婦進行超聲波檢驗,檢查胎兒大小是否符合胎齡、有沒有心跳、位置是否正常(例如是否宮外孕)、孕婦的子宮與卵巢有沒有問題等等。

    余啟文說﹕「若檢查後發覺完全沒有問題,胎兒正常,孕婦流血亦不多,只要照常覆診便可。」但若未能確定胎兒有沒有心跳、或胎兒比正常胎齡細小,便需隔一、兩星期再作檢查﹔若懷疑孕婦其他問題,例如宮外孕,便需要抽血化驗荷爾蒙(胎盤素)作參考。

    作小產狀 不宜勞動

    究竟作小產有沒有方法治理?余啟文表示,傳統會教孕婦臥床休息,但他說﹕「目前沒有科學證據,證實臥床休息絕對能保住胎兒,因為最後若小產,多數是因為胎兒本身出現問題,例如與染色體、遺傳等有關,而臥床不會令基因有任何改變,故幫助甚微。」同時,長期臥床會影響血液循環,外國就曾試過有孕婦因而患靜脈閉塞等併發症。

    他建議﹕「作小產的孕婦應該休息,不要擔擔抬抬、工作24小時,或作任何高危動作、跑馬拉松等。但上廁、洗面、出外散步這些活動,我們完全不會禁止,除非情況很特殊。」

    也有醫生開出「安胎藥」給作小產的孕婦。余啟文解釋,傳統的安胎藥為孕激素(即黃體素),有口服、塞陰道或打針等不同形式,能令子宮肌肉鬆弛,一般孕婦的卵巢及胎盤會自行製造。但亦有極少數孕婦,或本身荷爾蒙有毛病,或非正常受孕(如人工授精),身體未能製造孕激素,令子宮收縮,引致作小產,故需使用此「安胎藥」。

    服安胎藥 未必有用

    余啟文說﹕「這類孕婦比例很低,大概每100個中僅幾個。是否值得每個孕婦都開藥?或是所有都不用開?還是要先作化驗?不同醫生有不同見解。」他認為大部分孕婦服藥後,亦對作小產無幫助,但可能心理上好過一點。

    至於避免拿重物、減少工作時間,能否避免及減輕作小產情況?余啟文表示﹕「目前沒有很確切的證據顯示,長時間工作、過分操勞,對作小產有影響,但醫生也有惻隱之心,孕婦已在流血,還要她大量工作﹖就算不是作小產,一般孕婦容易腰骨痛,都不應拿重東西。」

    中醫角度 胎元不固

    註冊中醫師陳慧琼指出,一般人談「作小產」,即妊娠期陰道有小量出血,顏色淡紅、暗紅或鮮紅,時下時止等,這常是小產的先兆,並非真正小產,中醫一般稱為胎漏,相當於現代醫學的「先兆流產」。

    胎漏的病因病機是「沖任失調」、「胎元不固」。引起胎元不固的原因,可分成兩大類﹕

    1)胎元方面
    例如夫婦之精氣不足,或胎元有缺陷,即精子或卵子的缺損,或兩者均有缺損等。

    2)母體方面
    例如素體虛弱,腎氣不足;
    或懷孕後房事不慎,損傷腎氣;
    或脾胃虛弱;
    或七情鬱結,即情緒不安;
    或感受外邪,即受病毒、病菌感染等;
    或跌仆閃挫,或接觸有害物質等等。
    以上原因均會損及胎元,引發本病。

    陳慧琼指出,中醫治理胎漏,須辨證論治,了解究竟是虛症還是實症,虛症多因腎虛、氣血虛弱﹔實症常因血熱、血瘀引起。但臨床上,胎漏以虛症或虛中夾實多見。

    至於預防胎漏,陳慧琼表示須先了解原因,例如若為男方的精子不正常,則須請男方看醫生,否則難以懷孕,或容易小產﹔若女方月經不調或身體虛弱,亦須先調理好身體,才考慮受孕。

    而桑寄生蛋茶、蓮子雞蛋糖水等,均有安胎作用,孕婦平日亦可食用。

    資料由明報網站提供

  2. 恭喜你bingo。願你生個健康精靈bb。

    睇完你個blog我好感動,而且覺得自己好無知。我想要bb,但試咗幾個月都未得。多得你post你嘅經歷出嚟,如果唔係我都唔知有咁多程序同方法。例如我從來都唔知乜係破卵。

    我都係睇開黃斯雄,三月睇佢時發現排得唔正常,佢無比葯我,但叫我放鬆心情然後三個月後的day12覆診。而家仲未夠三個月,心情好忐忑,惟有邊看中医邊等Meng覆期。終於昨天第一次睇Meng,希望佢都會我心中的神医。

  3. hi MM,

    多謝,唔好話無知,你搵倒入嚟等於你有search資料啦。;p 幾個月唔算長呀,好多人都要約莫一年倒先中。

    dr. wong冇俾藥你,可能你年紀唔大,仲有時間慢慢試。有d人食排卵藥係好work,只係我咁啱係唔work果d,因為排卵藥會增加黃素化機會,而我本來已經係黃素化得幾密果種。btw,記住睇乜醫生都好,忌心急(個人經驗係緊張做成中醫所謂肝鬱氣結,西醫就係增加黃素化機會)。我知想中好難唔心急,但我加上好多人經驗都係差唔多放棄呀,唔想有果時呀、去旅行relax完先會中。只要你check過老公同你都冇問題 <– 如果只係間唔中黄素化,問題不大,孟煒醫呢d好耍家。我覺得中醫醫排卵不良係好過西醫,因為西醫只係得排卵藥一招,尤其係一切hormones level都正常,但經期唔準排卵不良加黃素化呢種,中醫調理比較有效。<– 唔止我一個case。

    另,如果你決定食孟煒d藥,我都會建議你唔好同時食西醫排卵藥住,可以試幾個cycle睇吓孟煒能唔能夠令你成功排卵先。

    祝你成功。

  4. GG

    HI 淘, 你好! 我係網上搵生仔資料時, 無意間搵到你个BLOG, 一睇之下覺得你識好多野, 文筆又好搞笑, 我一路睇都忍唔住笑呀, 哈哈! 其實我系想請教你關於生仔問題呀.….我又系用哂排卵試紙,量哂BBT, 但試左兩个cycle都未得呀…(体溫有升和有深粗, 證明有排卵架, 都唔知衰系邊…), 之前都check了老公精子識游水無問題, 所以第二个cycle開始睇中醫, 已睇了1 个cycle, 但我猶豫緊好唔好繼續睇, 一來中藥要每日飲都几貴, 二來飲得多又驚重金屬, 請問你覺得我呢个情況好唔好繼續睇呢? 網友話中醫兩至三个月都唔得, 就要放棄, 以你經驗, 我應該試多2个月先嗎? 請指教! 唔該哂!

  5. Hi, 介唔介意講幾歲同經期準唔準?睇你語氣似乎唔係覺得自己有問題,純粹初步搵吓料。呢類朋友我多數suggest乜醫生都唔睇,食定葉酸同老公book啱時間去吓旅行relax。基本上10個8個cycle先中係好正常。

  6. GG

    Thanks for your quick reply ar!!! 我今年32, 月經一向未準过, 有時31日, 有時34日, 總之每个月都唔同, 睇開的婦科西醫話我系多囊, 但我上網睇有此病既人多数肥同体毛多(我算廋, 体毛正常), 同埋要有超过12个卵泡先算, 我睇返D超声片又好似冇咁多卵泡….中醫就話就算多囊, 都唔算嚴重 (看我身型), 我上網看到体温有升高和紅D有深粗就有排卵, 我兩个cycle都在深粗開工都失敗, 所以不停搵資料, 無意中就看到你了….而家仲諗緊下个cycle看不看中醫好…..其實我知自己不易中, 又唔想浪費時間, 驚年紀越大机會仲低, 所以好心急想搵方法…..都怪自己年紀細時唔想生, 都而家想生, 咪走黎急囉…

  7. 你未算高齡不過over 30,算小問題。有高溫期around14日&深粗(真係同紅d條對比線一樣咁深)可以assume有排卵,如果未check輸卵管,可以check埋,亦可以過多幾個cycle先check。

    不過,經期唔準同PCOS係相對棘手問題,西醫係冇任何方法(佢有一堆hormones俾你食o既,但係咪叫醫我真係唔敢講)。同埋佢哋會assume 你still normal,通常解釋唔倒o既hormones問題佢哋都會話係PCOS,都有醫生話我係,但我根本一個徵狀都冇。如果你個中醫係reliable o既話,我會建議keep住睇,應該可以tune返準d period,亦可以試針炙,對我嚟講係有效,但sample size太細作不得準。

    anyway,我唔知你試咗幾耐,如果只係兩次,真係冇必要心急。呢個中醫如果3個cycle你都feel唔倒有任何分別,可以停,唔好俾太多壓力自己,照o係m come後第12、3日開始隔日做,唔好只係深粗果日,你hubby都有壓力啦,試多6至8個cycle先再去諗佢。

  8. GG

    通常解釋唔倒o既hormones問題佢哋都會話係PCOS –> 絕对認同! 可能我唔係典型的PCOS, 佢都話我系….我會KEEP住看中醫先, 你講得好岩, 可能我身边朋友1-3个cycle就搞掂, 所以比了很大壓力自己…..唔該哂你既宝貴意見, THKS!!

  9. 【明報專訊】浸會大學昨公布一項分析,發布145名因不孕求診的婦女,服用中藥後其中53人即37%成功懷孕。負責臨牀觀察的中醫師表示,不同不孕患者症狀不同,醫師須按患者用不同處方,包括調節肝、腎及卵巢功能。有接受3次人工受孕失敗的婦女,在浸大接受中醫治療4個月後,便成功自然受孕,自言高興得猶如「中六合彩頭獎」。
    http://news.sina.com.hk/news/20131115/-2-3116957/1.html

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s