3rd Trimester & 煲薑醋


早前玩apps o既相,唔知雞髀仔有冇咁q lu。

目前32周,接近尾聲,雖然好想佢快d出嚟唔好墜住我個肚,但又明知一定係足月先對個b好,冇法,唯有繼續等。托賴暫時一齊正常,除咗某日血壓高過外,係雞髀仔身型略細,不過都約重4磅2,醫生話正常。而自己知自己事,本來就唔係第14日排卵,所以遲幾日係合情合理。而家只欠36周驗埋B型鏈球菌就ok,本來諗住開刀唔使驗,不過盧醫生話因為有機會提早穿水,即係始終有機會接觸倒菌,但可以選擇唔驗o既。咁,正常情況下都係掌握更多資訊先可以避免擔心,可以驗o既又點會唔驗呢,嘥氣。

自家製薑醋蛋

同剝牙有得食雪糕一樣,生仔有得食薑醋。係,我知,唔剝同唔生都隨時可以食,俾我安慰吓自己好冇?本來諗住自己挑戰,點知淘媽淘爸又話幫手,咁就整理吓資料。

1. 時間:
通常生前一個月左右準備薑同醋,俾時間佢入味。蛋同豬手豬腳就食前幾日至加。

2. 煲:
一定要用瓦煲(或陶瓷啦),金屬唔得,其他又唔好食咁話。

3. 醋:
據聞悅和八珍好食喎,仲有鉅利、同珍、etc牌子,其實幾間都可以網上訂,不過超市八珍可能最易買倒啩;(悅和有特級甜醋同添丁甜醋之分,只見添丁有焦糖同平d,不過都係揀特級啦,硬係覺得貴少少好d咁,忽然好傻好天真。)
一般都係甜醋溝黑糯米醋(酸醋),甜醋係好味,但有酸醋先可溶較多骨頭入面鈣質。一般比例為甜醋比酸醋9:1至7:3左右,視乎你鍾意酸定甜d,我鍾意酸少少82啩。

4. 薑:
老人家話老薑驅風驅寒,但較辣,子薑比較唔辣啱親友食。本來諗住一樣一半,不過過咗農曆八月都比較難搵子薑,所以睇佢哋買倒乜啦。一般比例係薑:醋 = 1:1,即20斤薑20斤醋,有d食譜會薑略少d。10斤醋約等於4.8L,我暫時預40斤,因為後加好似冇咁好食喎。
產前一個月,刨曬薑,薑皮可以風乾留俾孕婦坐月煲水沖涼用。然後有d人話d薑可以先風乾一兩日再炒,有d就話直接唔落油擺落鑊爆,有d就話可以爆時加少少油鹽出味,悅和送貨亞叔教路爆完都仲可以再風乾一兩日,唔係會出水云云,睇佢哋啦。薑唔可以用刀切,只可以用刀背拍扁拍散,唔係會有渣咁話,太大舊可以用手搣開。

5. 薑連醋:
薑連醋煲滾就可以室溫長擺,應該每幾日或每星期拎出嚟滾滾佢防菌就ok,我諗視乎濕度同溫度啦,自己諗。有人教可以放塊竹簍o係煲底免黐底。想煲嘢襟擺d就唔好直接將蛋或豬放落水,而要另外用一細瓦煲嚟煮。

6. 蛋:
以前聽人話直接將生雞蛋放入醋度,等蛋殼d鈣質都溶埋出嚟喎,不過而家見d食譜,多數分開煲熟去殼先放入薑醋度,通常食前一日ok,越耐越鐵蛋咁lor,隨你鍾意。有d人話落鴨蛋仲好味,係鮮鴨蛋先好味呀。

7. 豬手豬腳:
唯一諗倒要去毛啫,仲有咩呢?食之前3、4日,加鹽飛埋水先放落去最淋咁話,又係試吓lor。淘爸搞笑問我洗唔洗去皮,咁d骨膠原點算?其實呢d嘢一凍咗就可以刮走表面層油啦,怕乜。

好,o係我親自監督吓,可以當自己挑戰咗喇,哈哈。不過開完刀都要等清惡露兼傷口好返先食得,唔同剝牙喎。仲有餵人奶仲唔可以食太多薑,話驚bb燥喎。好在醉翁之意只在蛋同醋,俾盡一日咪最多兩三隻。

3rd Trimester & 煲薑醋” 有 14 則迴響

  1. 美人胚子

    我都係, 只食旦同醋,將旦王"顏"爛,連醋食,好好味,哈哈…..我係有個好好好好既朋友幫我專門負責煲,好好味,唔駛自己搞,哈哈!!!

  2. Jenny@toyo

    唔駛頭痛,叫啲friend去你屋企,探訪者1人1碗薑醋,親友如是。但通常你們兩位媽咪都會去派薑醋比親友,方便晒。話你知,我生完兩個bb後都無食過一啖薑醋,是真的!

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s