鍛鍊EQ─為雞髀仔做情緒教練


EQ
一路都覺得自己冇乜EQ,近嚟再上嬰院安排嘅情緒管理course,講者陳姑娘(社工,唔好意思又唔記得名,得閒搵返)提及要小朋友情緒穏定,父母首先必須情緒穏定,言教不及身教嘛。

而情緒並無好壞之分,就算負面情緒其實有佢存在價值,擔憂可以令人為某事準備更充足、憤怒可以提升能量、驚慌可以令人遠離危險等等……而有某種情緒之後嘅處理方法,表達手法等等先決定一個人EQ高低,而本書話EQ對人嘅成就或生活又有比IQ更大嘅影響。

提起EQ,我諗好多人都知係要控制、管理好自己情緒,加上理解人哋情緒。當日陳姑娘舉嘅例我大概唔記得7788,但最重要內容有兩點,其一就係佢建議睇嘅上面呢本Daniel Goleman 嘅EQ(係呀,10週年我先睇,又嚟寫書評,so?有問題嗎?;p )嘅重點:

同理心

唔係咩新嘢,有時外國學者所「創立」嘅,你可能幼稚園都聽孔生講過。己所不欲,勿施於人。well,外國嘅強項就係將呢d古老智慧系統化嘛。

EQ example 1

何謂同理心?簡單講就係角色扮演啦,當你自己係對方,理解佢嘅諗法、立場、理由、感受之之類類。呢樣嘢係好難,但同IQ唔同,有得train,重點就係你要肯對某個人俾力,用心。對亞豬亞狗都用同理心好攰,除非你個人天生係感情豐富嘅動物。不過,暫時我覺得我對雞髀仔係可以咁做,觀察,代入,慢慢就會了解一個人。上圖令人surprise 嘅地方係,即使強國人,都係可以有heart嘅。

另一例子係陳姑娘舉嘅,如果某日亞仔返屋企喊曬口話今日最fd個同學仔搶咗佢粒糖,你會點處理呀?有人答,俾返兩粒佢。有人答好小事啫,唔好唔開心之類。呢d都係我哋大人嘅諗法。要設身處地諗,如果你係佢,粒糖對你天咁大,你冇諗過有人會俾返你,你冇諗過你最fd果個會搶你嘢,etc。(我諗:當你個best fd搶咗你條仔,你會點?)咁佢嘅「負能量」既有失去嘅唔開心,可能亦有對朋友嘅失望、仇恨、憤怒等交雜。如果呢個時候大人只係叫佢唔好開心啦,就好似一盤冷水潑落去,佢可能會覺得你唔明白佢,嬲埋你,最壞嘅甚至係佢開始覺得原來負面情緒係衰嘢嚟,媽媽會唔鍾意,然後壓抑自己,最終演變為情緒病。

點解要將「負能量」分仔細?就係講者第二個重點,應該本書都冇講。就係要教小朋友認識每一種情緒,感受得倒而且識得講出嚟。當你知道咗之後,你同佢都可以更更容易疏導,留意情緒係要用大禹治水法,要疏導唔可以堵塞。每個人疏導方法唔同,女人可能講一餐飽就冇事,男人或者唔出聲谷大啖氣。如果係因為失去唔開心,可以俾嘢補償。如果對朋友失望,亦可以鼓勵佢了解朋友點解會咁,可能無心之失。總括而言父母有耐性,觀察,叫小朋友理解學習自己情緒,久而久之就會慢慢管理好。

仲有本書有講嘅未必算重點嘅係延遲滿足,小朋友大多數好心急,研究發現,同4歲左右小朋友做實驗,叫佢揀而家可以攞某樣玩具或食物,但如果等10分鐘可以有兩倍或更多。廿年後發現,肯等嘅小朋友嘅成就普遍比唔肯等嘅好。本書仲有好多例子,說明同理心應用喺不同範疇,例如醫生對病人用同理心,甚至藥效都比較好。同人講說話唔好用D輕蔑嘅口吻,咁所有人際關係都會更好,我知係老生常談,不過對我呢D慣性成日串人嘅人嚟講,定期背熟同理心呢3個字,當佢係電視白痴廣告咁提醒自己都好嘅,雖然掋x的人係始終要x的,但記住對自己重要的人好lor。

而本書學術性之處仲有關於腦部結構同情緒嘅關係,例如杏仁核受損後病人缺乏負面情緒,但理性又完好無缺,無論係咪為bb都值得睇。

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s