新加坡遊記150807


Fullerton Breakfast
今日先食一個營養豐富早餐。


有幾豐富,可以睇片,係衰在我哋唔夠早起身,坐唔倒有view位置,但嘢食就真係好多選擇,朝早有幾款唔同咖哩加薄餅揀,應該就算連超乎常人水平偏食嘅薯嚟到,都唔會complain唔啱食。

由於時間唔容許睇曬,禽日已經叫雞髀仔3揀2,睇動物、雀仔同蘭花古樹之類植物(National Botanic Garden),佢嘅選擇係動物同動物,咁由於夜晚已經會睇Night Safari,所以我幫佢揀咗雀同動物。又由於雀比較遠離市區,動物園同夜間動物園係相同地點,所以先出發去雀仔公園。兩個亞姨都放棄今日行程,瞓夠去金沙high tea喎。

Jurong Bird Park
Jurong Bird Park比較近新加坡西邊,又塞車,朝早又係落大雨,去到已經11點半。

Ticket Charges
由於大雨,counter唔算超多人,又可以睇個explorer pass幫我哋慳咗一筆。我哋今日會去4份之3個有動物嘅公園呀,係除咗River Safari,有生之年再算啦。

Jurong Bird Park Map
環園有tram ride,不過又費事排隊,算。雞髀仔例牌全程哎攰同眼瞓,都唔明點解未開始行就話攰,心情唔靚。

Bird Park 2
如果有時間,可以行一整日慢慢睇。不過隻雞髀極速瞓咗。基本上,因為香港冇乜,我去親旅行都鍾意睇水族館呀動物園呢啲嘢。唔去旅行咪去旺角雀仔街魚街同海洋公園囉。;p 裕廊雀鳥公園應該係亞洲最大型嘅雀鳥公園,其中emu、猛禽、連犀鳥都好多種,雖然數量唔多,不過呢個公園我係幾enjoy嘅。

Bird Park 3
雀鳥公園梗係唔少得呢隻企鵝啦。

Jurong Bird Park Lunch 2
時間近3點,本來諗住出去食嘢,點知雞髀仔一見倒呢度啲動物枱櫈已經自己搵定位坐好等食,是但啦,以為仲有時間,咪食埋先行。

Jurong Bird Park Lunch
我要炸魚薯條餐,雞髀舅父係意粉餐,質素一般唔算太難食,樂園價大概12、3蚊坡紙一個餐連埋一隻紀念膠杯。美綠milo繼續周圍有得飲,可能common程度equal to香港horlick或阿華田。

sub urban 1
食完嘢出嚟發覺根本冇乜的士入倒嚟,公園既然有免費shuttle bus去最近MRT Pioneer站,又搭咗。

sub urban 2
點知出到嚟,係就係有的士站,但根本冇的士。有都係on call、有客或有綠色字寫去boon lay,google神話即係隔離車站,如果搭電車我哋去到動物園都應該收檔。又難怪,呢度周圍係好似上面呢啲政府組屋,比較偏遠地區。題外話:有的士司機話其實而家新一代都唔係咁容易買倒政府組屋㗎咋,唔係好似我哋香港人所諗新加坡人個個有屋住咁話喎。

Call Taxi
等等吓唔對路已經4點1,咁啱見倒兩個灰色軍裝華裔卜卜脆青年有的士on call接,趁人上車前請教到底係咪要call車,佢話you’d better call。(應該夠18歲就要參軍兩年,之後都仲要每年至每兩年報到服幾日役好似。)ok,諗住唔搵transcab,不過第一間city cab個operator居然話附近冇車。接受現實,始終同transcab有緣,一call 5 mins有車,好彩。(由每日歸納法,喺新加坡截倒的士真係好彩,你話慘唔慘?俾錢都唔一定有service。喺酒店好啲,喺街截如果多人,真係個個同你搶,好似n年前香港。)btw,亦再次確認張tourist sim好用,當地電話任打。

Zoo 1
嚟到Singapore Zoo已經係4點半,動物園收6點,所以輕鬆入場唔多使排隊。亦都唔可以喺度先換埋night safari嘅入場證。到我哋出返嚟先知瀨嘢。

Zoo 2
呢度其實亦係好多嘢睇,不過時間有限走馬看花,連白老虎都冇睇到。

Singapore Zoo Map
但即使得唔夠兩粒鐘,入到嚟都係有嘢玩有嘢學嘅,又見倒獅子打交。

Zoo 3
斑馬長頸鹿狒狒唔在講,

Zoo 5
風景靚,長臂猿喺樹頂周圍跳嚟跳去,

Zoo 4
仲俾我影倒全世界最大嘅臭花,淨係喺相同tv見過咋。anyway,呢朵應該直徑冇一米,同埋聞落唔臭,引唔倒烏蝿喇。


當然,最開心係摸倒佢:環尾狐猴!係,我知我錯!但同放蛇差佬遇著技師一樣,我…我忍唔住呀。^^ 佢哋根本就係叫緊:「摸我啦~埋嚟摸喇~埋嚟玩喇~」我唔多口講請勿模仿喇,見倒就知嘥氣,冇用。有啲小朋友甚至拖住佢哋隻手,staff經過雖然有叫大家don’t touch wild animal,但相信佢一行開就冇猴理佢。

Night Safari Q
6點零離開日間動物園行去夜間動物園Night Safari,撞啱50周年國慶,呢度超超超多印度人,或者有其他,唔知,反正膚色差唔多,雖然我排得前,但佢哋會恣無忌憚咁打你尖,笑笑口。當你好嬲講咁大聲用英文請佢哋排隊,佢會繼續笑笑口咁望你,請你食糖跟住摸吓你個仔塊面,然後用廣東話講一句非常清楚嘅「死八婆」。X!雖然一早知我今世唔打算去印度,但真係同big6不相上下。下次排迪士尼時我應該感恩,前前後後夾同頂住你嘅,唔係印巴。冇興趣同佢哋嘈,反正要等埋兩個亞姨嚟join。

Night Safari Tram
換曬證,等齊人,排到接近上tram,唔係電車,其實係一架長吉普車咁上下。呢度,又有人不斷打尖,今次輸到同胞喇,不斷攝位攝位,最後我忍唔住問到底佢哋識唔識前前後後。一位操普通話女士話我全部都認識,有大肚婆有bb,佢哋一團22人。我話你哋係一團人唔係一家人,佢仲夠膽死同我講「請你理解」,屌,不如你叫曬14億人嚟排啦。我心諗我哋5個你22個,點解你唔排我哋後面?不過,今日已經唔想理呢啲煩事,我由q你,唔想同你同一車。後面反而係幾一個香港家庭,仲好,傾傾吓偈時間快啲過。最後又離奇哋果堆人上咗後排,而唔知點解我哋唔夠10個香港人坐咗第一卡喎,咁即係我冇俾人打尖,哈哈。<–超低能

Night Safari Map
由地圖可以睇倒其實坐車只可以睇倒一部份園區,有啲如夜猴果類係必須步行入館。

Night Safari crane
尤其如果想曝動物,應該都係步行先影倒。不過,又係有老有嫩咁,當然我哋坐完車就離開動物園啦。兩個亞姨都猶疑咗好耐先肯嚟咋。

Chinatown Food Street
然後截倒一個劃一收費50蚊坡幣7人的士,是鬼但,難得有車,亦唔係搵笨。不過呢,明明係想去食文東記海南雞飯,但唔知係大家溝通有問題定乜,最後去咗冇文東記嘅牛車水美食街。

Chinatown Food Street 3
不過呢,新航假期package一樣有牛車水coupon送,我哋5個人有成40蚊坡幣用曬。今晚嘅大蝦ok,係貴少少8蚊坡紙一隻。蠔都比較似樣,蠔餅亦ok好食。

Chinatown Food Street 2
冬蔭功湯怪咗啲,其他嘢都一般啦,但overall比老巴剎掋食。另,食完行吓一陣似幾十年前女人街嘅牛車水,係冇嘢好買嘅,亞姨買完藥油又一齊打道回酒店。兩個亞姨聽日一早返香港,而我哋3件就會繼續最後一日行程。

發表迴響

在下方填入你的資料或按右方圖示以社群網站登入:

WordPress.com Logo

你正使用 WordPress.com 帳號留言。 登出 / 變更 )

Twitter picture

你正使用 Twitter 帳號留言。 登出 / 變更 )

Facebook照片

你正使用 Facebook 帳號留言。 登出 / 變更 )

Google+ photo

你正使用 Google+ 帳號留言。 登出 / 變更 )

連結到 %s