與MTR的一席談


前晚同MTR Service Update版主(之一)開會,就將來沙中線,尤其減3卡既問題傾左3粒鐘,感覺對方好有誠意及坦誠,而討論結果係有樂觀亦有悲觀,對方希望部份討論內容不要公開,留待佢地日後寫文再詳細講,以下是可以公開的部份:

(1)
版主表示,港鐵官方有意隱瞞訊息,以免公眾追問,而公開資料中,不少是語言偽術或數字遊戲,這一點,其實大家都心知肚明。

(2)
根據港鐵對外既官方資料,現時東鐵線早繁每小時有20班車,將來減3卡,但同時更新訊號系統,可以增加班次至27班,抵消減車卡既影響。但MTR Service Update表示,呢個講法係錯既,正確黎講,而家已經行緊每小時24班,將來加到32班。

我問點解,版主話,24班車係朝早8-9係九龍塘數出黎,而唔係羅湖及落馬州開出既班次,因為朝早大埔同火炭各有幾班短途車開出,連同羅湖及落馬州既長途車,總共有24班車係朝早8-9經過九龍塘站。

(3)
版主提出好幾樣證據,證明東鐵日後確實可以加足班次,以抵消減車卡既影響,我覺得都有說服力,暫且信住先。

(4)
關於頭等的問題。我問版主,現時頭等佔整列車的12分1,之後是9分1,即頭等對載客量的影響大左,版主答,將來既頭等有兩度門,方便上落之餘,亦可令乘客平均分佈在整個車廂中,而唔係好似而家咁,得一度門,早繁乘客集中企係門口位,塞住個入口,令月台上既人想入都入唔到,而一頭一尾仲有大量空間,即係話,將來既頭等既實際載客量會多過以前既頭等設計。當然,就算頭等車廂企滿人(事實上,我相信頭等唔會企滿人,咁我搭頭等為乜?不如搭普通!要知道,頭等本身既設計,根本唔係預左企滿人!),都唔會同普通等一樣。

補充:貼文後,有網友回應,減車卡前,每小時有24卡頭等和264卡普通等,減車卡後,變成32卡頭等和256卡普通等。若綜合計算,減卡前後,每小時都有288卡,但若把頭等和普通等分開計,則減卡後,普通等少了8卡,差不多等於一列列車既載客量。而更要命既係,沙中線通車初期,港鐵是不會用盡32班車既最高班次,暫定係30班,如果係真,情況會更令人擔心。呢一點,我要再跟進一下,港鐵是否低估左保留頭等對載客量既影響?

(5)
關於北環線,大家可以死左條心,就連版主都話北環線既分流作用係「天真」(exact wording),因為佢地內部計算過,由上水搭出去紅磡,同搭北環線轉西鐵出紅磡,時間差唔多,無快到,但就要轉幾次車,亦要冒轉車時唔可以第一班就上到,要等多班車既風險(例如你去上水月台,啱啱見到去落馬州既車駛走左,下一架係去羅湖,咁你就再要等兩班車),但東鐵就可以直出唔駛轉,正常北區人唔會棄東鐵改搭西鐵。即使將來古洞站居民,佢地介乎東西鐵中間,應該都會傾向搭東鐵,因為有位座,搭西鐵要企,你會點揀?

另一方面,北區出西九龍及荃灣一帶,北環線駁西鐵亦唔方便,因為西鐵只去荃灣西,遠離市中心,下一個站就係美孚,若想去大窩口、葵涌、葵興、荔枝角、長沙灣、深水埗,就要係西鐵美孚站行一段好長既路去美孚地鐵站改搭荃灣線,比現時搭巴士(去荃灣一帶)或搭東鐵轉地鐵(去深水埗、荔枝角、長沙灣等)更麻煩。

關於北環線仲有一點,版主話呢個計劃有啲似以前既數碼港、中藥港之類,即係大隻講。我話北環線明明已經係《2014鐵路發展策略》既項目,唔係通過左咩?佢話呢啲公共行政其實有好多關要過,但佢覺得政府唔似有大動作做呢樣野,加上佢地覺北環線客量成疑,尤其非繁忙時間,政府唔會起一條無人搭既鐵路黎獻世,所以佢唔排除有爛尾既可能。

(6)
關於鐵路同其他交通工具既競爭,即係新鐵路網會吸引而家搭巴士返工既人改搭火車,例如東西走廊途經東九龍包括馬頭圍、土瓜灣、啟德等地;南北走廊可以直達港島唔駛轉車;北環線或會吸引新界西居民搭東鐵去大埔、大學及火炭返工,版主表示more or less有呢個可能,但唔駛太悲觀,以過海為例,佢認為現時巴士公司識得靈活調動路線,好似北區373A經大欖、西隧出港島,避開左塞爆既獅隧同紅隧,佢覺得都幾方便,巴士客未必會轉投南北走廊既懷抱。

我唔同意版主既睇法。

我認為而家搭巴士出港島既人,佢地之所以唔想搭火車,主要係避免係九龍塘或紅磡轉車既麻煩,但日後東鐵一程車可以過海,唔駛再係九龍塘同紅磡團團轉,正常人都會揀火車而棄巴士,獅隧、紅隧、大老山唔駛講,日日塞,就算大欖、西隧而家尚算OK,但亦難保將來可以繼續暢通無阻,因為新界西人口不斷增加,洪水橋發展區將來會容納21萬人,比新界東北兩個發展區加埋仲要多,錦上路又話起新市鎮,又有9萬人,呢兩個地方出九龍同港島,都係經大欖同西隧,邊個可以保證將來大欖同西隧唔會爆到七彩?

究竟將來既新鐵路網會唔會搶走大量巴士客,繼而加重鐵路運輸既負擔?前車可鑑,大家可以睇下將軍澳線、西鐵線(2009年由南昌伸延至紅磡站)以及而家既港島西延線,大家就心裡有數啦。

(7)
我問版主,東鐵有好幾個站,月台中間位置因為有電梯,比較窄,例如大埔、火炭、沙田、大圍、九龍塘,將來減3卡,乘客集中中間位置上車,咁咪迫爆月台?

版主承認公司無諗過呢個問題,並同意呢幾個站既月台有先天設計毛病,且不可能糾正,但佢覺得只要班次增加左,就可以及時疏導人流,月台就唔會迫爆。我話,就算班次真係好似佢地所講,由24班加到32班,載客量都係同現時相若,但新界東人口會不斷增加。版主話,9卡 x 32班車既載客量,其實係多過而家12卡 x 24班車(佢有比個數字我睇,係「多啲」既,但唔係多好多,大概幾個%左右),佢話,只要新界東北發展計劃最終爛尾,「搞唔成」,呢個減車卡加班次既安排,應該夠應付未來所需。

好重要,大家要留意,尋晚既討論重點,係版主假設新界東北發展「搞唔成」,咁既話,東鐵減3卡既影響,其實唔係外界諗得咁悲觀。但如果新界東北發展「搞得成」呢?佢無答。咁點解版主會覺得有機會「搞唔成」?佢話將來有好多變數,而呢個計劃現時只係第一階段研究,仲有好多關要過。我唔知真定假,只希望承佢貴言,「搞唔成」,就一天都光晒。

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s