關於12月3日On99行去落馬洲一事，我想講……
今次已經係小弟第三次搞同類活動，第一次在上年年尾，由尖沙咀行去羅湖，成功。第二次在今年年頭，由火炭兜大圈經大尾督、鹿頸去落馬洲，可惜中途生水泡，劇痛難忍而取消。今次之所以再由尖沙咀出發，並把終點定在落馬洲，一來要彌補上次半途而廢的遺憾，二來，亦要令第一次行程變得更完整，何解？因為東鐵線由尖東出發，終點分別是羅湖及落馬洲。第一次我和朋友只係行到去羅湖，今次劍指落馬洲，才叫完整KO整條東鐵線，對不對？
行程已定，就要約朋友，夾時間。我們這些七、八十後老鬼，約朋友難過登天，平時想出來食餐飯聚下舊，可以由年頭約到年尾，他們一味說忙忙忙，忙就不用食飯嗎？於是有人退而求其次，不吃飯，出來飲杯酒都好，較易約得成。
我呢，就反其道而行，想一個big project出來，要新奇刺激好玩的，目的係引蛇出洞，令老友不惜掉低手頭上的工作，還有屋企的老婆仔女，由朝到晚玩大佢！
甚麼project好呢？幾年前見北區group有網友挑戰由上水行路出尖咀，我覺得幾過癮，心想：如果係我會選擇逆走，行完可以第一時間返屋企沖涼睡覺。心動不如行動，於是係facebook約朋友，如果無人響應就算數，不料有三個傻佬響應，騎虎難下，唯有頂硬上。所謂名不正則言不順，行動要有代號，個朵夠響先壯到膽，就叫「青山走犯」啦！說過了，前後走了兩次犯，一次成功，一次失敗，但在朋友圈中都叫打響左名堂，好多老友都如果再搞記得預他們一份。
終於入正題。今次第三次走犯，由約人到探路，用了個月時間準備，原本最後一程打算經蛇嶺去落馬洲，但試行後，發覺落山難度太高，我有行山底都覺得難搞，斜都算啦，頂佢個肺，還要「爆林」（隱約有條路，但給草叢完全遮蓋，跟「爆林」差不多），考慮到走犯當日我們已經行到只剩半條人命，無謂冒險，決定不行蛇嶺，改行山腳的平路，但求平平安安到終點。
好了，萬事俱備，走犯當日天晴乾燥，適宜遠……足。我們一行五人按計劃七點準時由尖沙咀出發，另有一人在大圍加入，而我們的家眷（老婆仔女）則在羅湖會合，一齊行最後一段凱旋之路。大隊最初高速快放，一個鐘就去到馬騮山腳，再以同樣速度上山。
就在這個時候，弊啦，腳趾有少少異樣，莫非出水泡？回想上次走犯就係衰係水泡上，不禁心中一寒：「主呀，救我！如果今次再因為水泡而半途而廢，你要我之後仲點樣出來行？」
好彩我之前做足準備，預先用膠布包實十隻腳趾，除鞋一看，原來異樣的感覺源於其中兩塊膠布鬆開了，遂以新膠布重新包紮，由那時起到最後，腳趾再無問題，惡夢似乎過去了。
不過，我的惡夢過去，隊友的惡夢卻剛剛開始，由吐露港起，陸續有隊友受水泡之苦，寸步難行，大隊速度開始下降，進度嚴重落後，結果比預計時間慢了個半鐘才到達羅湖。
此時，已有兩位隊友難忍劇痛而退出，我感同身受，因為我上次都試過，不想放棄，但真係好痛好痛，那種痛，無出過水泡的人係好難明白。我跟隊友講，肌肉麻痺、酸痛，甚至抽筋都係小事，只要無水泡，你要我行上深圳再拆返香港都得，但一出水泡就無得傾。
如前述，我們安排了家眷在羅湖加入，但因為大隊遲大到，原本三點鐘變到五點，如果按計劃行事，預計七點行畢全程會變九點，大人無所謂，大不了射波，但細路仔要返學，九點行完都還未食晚飯，返到屋企幾點？而且，老婆已經黑面，點算好呢？
唯有出plan B，即家眷陪我們去到得月樓警崗便折返古洞茶樓開位等，我們照去落馬洲，再坐的士返古洞開飯。此時大隊剩下四人，因為入黑，其中兩人護送家眷去古洞，我和體力最好的一個快馬加鞭鳩衝去落馬洲完成最後一站。
之前探路，我用均速由得月樓行去落馬洲，大概個半鐘，家眷同行，預計兩個鐘，現在只有我們二人，無牽無掛，於是用盡最後一口氣，連行帶跑衝呀衝。
不知是否迴光反照，愈衝愈有，一路衝一路看錶，比預期快，有機會一個鐘內到達，於是加速加速再加速，在月色下，漁塘旁，狗吠之聲相聞，兩個傻佬馬不停蹄向邊境進發，可惜最後都要超時十分鐘，但都遠比預計的個半鐘為快。就在閘口外，阿sir離遠見我們如狼似虎衝過來，以為我們真係青山走犯，馬上走出來攔路，問我們所為何事，當他知道原因後，就笑一笑返回警崗內玩電話。
我們好不容易完成了壯舉，當然要影相打卡呃下like，無獎品都起碼心靈滿足。自high完後，便坐的士返古洞食飯。最好笑係，我們早過家眷到古洞，原來他們無坐小巴（我原本叫佢地去懲教所搭51K係茶樓落車），而係選擇行路，慢吞吞，結果比我們還要遲。無所謂了，總之有飯食就得，我們再不吃飯，真係可以開追悼會了。
玩完這一次，仲有無下次？緊係有啦，路線都定好，由屯門碼頭行去打鼓嶺，嘩，真係未出發先興奮！由於屯門、元朗、洪水橋一帶我不熟路，要慢慢探路，我估第四次走犯應該係下年年尾了。
各位老友，到時記得出席呀！
薯淘同雞 