滋潤黑糖甜杏玉桂薑手工皂

材料:
椰子油150g
棕櫚油150g
橄欖油100g
甜杏油 50g
乳木果脂 50g
NaOH 氫氧化鈉 76g
台灣黑糖(from Felix)60g
蒸餾水 160g
新疆薰衣草籽 (from 花花)大量
Cinnamon 玉桂精油 5ml
Ginger 薑精油 5ml
成品INS值計為164
well,自用嘅嘢最好forget成本。 ;p

磅好油,乳本果脂於室溫下為固體,全部油品一併加熱至液體。
黑糖加水未必溶,但加上NaOH會自行發熱溶曬。

雞髀仔出世前最後一次整番梘,今次嘅梘應該係軟硬度最適中時候入模,不過禽日先入,我今日又心急起模喇,略軟,但如果有皂章就啱曬。曾經自己用玻璃膠意圖整皂章,但失敗作就費事post出嚟喇,失敗原因不外乎懶,因為我用fimo clay / 軟陶 / 樹脂粘土做咗個模,但居然意圖唔焗佢就用AB膠 / 水晶膠直接倒落去,封口又封得唔好漏曬,結果梗係一pet嘢失敗ed。唔知我講乜please skip。

據整開梘網友教路,坊間話薑同玉桂精油對皮膚有刺激成份係錯誤嘅講法,佢話精油入面並無刺激成份。咁今次可以試吓啦,薑同玉桂都啱坐月子用,不過等得熟成嚟可能都坐完。anyway亞媽教落坐月坐足100日,唔係30日,咁即係之後用亦冇壞啦。今次浸味係我咁多次最like嘅,好香甜令人想食嘢嘅味。

廣告

3.6牛乳薰衣草手工皂

做法參考第一件
今次材料:
椰子油125g
棕櫚油125g
橄欖油200g
蓖麻油 50g
NaOH 氫氧化鈉80g
北海道3.6牛乳160g
薰衣草精油 10ml
今次加咗一樽銀色金蔥粉約5g,所以d梘近睇會閃閃令

薯話咁折墮用3.6牛奶嚟整番梘,其實係我咳咗好耐唔飲得奶,佢又唔飲奶,為免少少奶過期先咁慳儉咋。另,上次加220g水似乎d梘好快軟曬,今次又用返少d奶睇吓點。

結果因為又係加咗蓖麻油,基本上唔洗點樣用力已經好快trace,d梘又實淨,於是矽膠模出嚟呢d梘形狀都近乎完美。

但係我另外放落500ml大模果舊,一切就碎曬,所以下次要記住,凡親用蓖麻油,直接落細皂模出嚟效果會最靚,而且又唔多洗搞。如果用大模兼想切皂最好加多d液體等佢軟少少易切。

同埋裝完落模,記住要dun(3)曬d氣泡出嚟,唔係就好似上面呢舊咁崩崩哋。另,今次同樣唔用香精用精油,牛奶凍溶氫氧化鈉,加落油時都唔加熱,終於做倒白雪雪牛奶皂。(氫氧化鈉加落奶時一定會變黃,但入模放一日後就會變白。)而用硬膠模即圓形星月果塊同鴨仔冰格出嚟都會略黃,係矽膠最白,唔知點解呢。

薰衣草精油冇茶樹浸味咁搶(兩隻都對孕婦安全),10ml都好似唔多夠喉咁,其實買咗肉桂精油同薑精油,不過驚大肚婆唔用得住,下轉先。網友話其實用得,不過唔敢試住。

拉茜牌茶樹薰衣草苦楝手工皂

前排試用自己整番梘幫拉茜沖涼,感覺ok,又平過街買果d狗用o既洗毛水,唔知點解竉物用品貴過人。其次,拉茜自從俾我剪咗d頸毛後一直未出返厚,雖然醫生話佢d皮膚冇事,但紅紅o地,所以一於整返件拉茜牌梘俾佢用吓,不過一batch通常都10件8件,淨係佢有排用,所以整到人都用得就啱喇。上次用香精整,浸味對人ok,用落狗度好怪,所以今次都係用精油算。

材料:
椰子油 125g
棕櫚油 125g
橄欖油 150g
蓖麻油 50g
苦楝油 50g
薰衣草精油 10ml
茶樹精油 10ml
氫氧化納 80g
水 220g

做法可以睇返第一次

蓖麻油,貪佢潤滑皮膚對毛髮好,最好d毛生快d。加苦楝係貪佢消炎、止癢、殺菌驅蚤、蟲,當然佢會繼續用frontline plus,唔會單靠苦楝。注意苦楝油千祈唔好買花墟殺蟲果d,冷壓榨取俾人用呢d浸味唔重o架。薰衣草精油係平衡皮脂分泌,防濕疹、殺菌驅蟲、鎮靜、好味咁啦。茶樹消炎對皮膚好殺菌驅蟲。本來仲想加多d,如雪松香茅之類,不過用大量精油太貴喇,而且到熟成時精油都揮發曬,睇吓今次成效點先啦。最後發現唔記得買蒸餾水,咁就用凍滾水算數。


由於加咗苦楝,d油好深色。今次懶醒以為唔落香精要有排攪,o係yahoo拍賣買咗個電動coffee creamer。點知,一加鹼水,皂化速度同加香精冇乜分別,甚至更唔均勻,因為coffee creamer範圍太細,亦可能因為加咗蓖麻油,會加速trace。不過,唔均勻得嚟,整體較上次軟,勉強可以入倒模。今次o係天麗買矽膠模,大部份貨品都偏貴,冇法,鬼叫佢有舖面,同都有幾多現貨模。不過,佢d模唔夠J’s Land o既硬淨,我指係用較多矽膠令外圍冇咁易變型,而唔係矽膠本身硬度。不過講真,再整多d都唔會吓吓用模咁煩啦,送人除外。模軟其實使用上冇問題,問題係我衰在將d矽膠模叠高,所以個底有少少變型。而精油就o係兆成行買,各款精油10ml的話唔算平,但50ml百二蚊,唔知仲有冇地方平過佢呢?


成品核核突突,所以雖然天麗話影幅相俾佢下次有85折,但都係留返下轉先。又要等兩三個星期先可以俾拉茜試吓lu。另,個coffee creamer留返嚟打奶,效果唔錯。