自中四「從良」後,我從未被警察當街盤問過,但好不幸,日前終於開齋。
話說上星期五,薯淘出外享用晚膳,那個地方,行路嫌遠,坐車又嫌近,最好踏單車,只需五分鐘。到達後,先鎖好車,再開餐。吃飽後,準備回家,卻發覺單車鎖壞了,擾攘半小時,仍無法開啟。由於二車同用一鎖,薯淘無奈,只好步行回家。
翌日,薯淘到單車舖求助,不遂,再試五金舖,不行,別無他法,唯有把心一橫,強行爆鎖。我沒工具,但朋友有,除電鑽外,甚麼都齊,約好星期二晚做世界。寫到這裡,相信大家已經估到發生甚麼事。無錯,我們被警察發現了!
就在當晚,淘要學琴,只得我和朋友,兩條麻甩,帶齊架生前往開工。雖然單車是自己的,但無從證明,若遭發現,如何是好?但聽朋友講,爆鎖最多十分鐘,應該神不知,鬼不覺。
沒料到,正當朋友準備動手,眼前忽然閃出幾個人影,抬頭一望,大鑊,是警察,還要是藍帽子,一共三人,雙方只有數步距離,走不了。
「你們幹甚麼?」
「無呀,我個鎖壞了,叫朋友幫手開。」
警察望向一地架生,又鋸又鎚,狀甚疑惑:「開鎖?拿身份證出來!住係邊呀?點解泊架車係度?架車買左幾耐?係邊度買?這些架生你架?你做邊行?」
之前聽朋友講,警察盤問疑犯,習慣一條問題問九萬幾次,以測試有無前後矛盾,今次我親身經歷,證明此言非虛。甚麼「你住邊度」、「架車買左幾耐」等問題,問完又問,然後換另一個警察,再問同樣問題,我們答完又答,真係答了九萬幾次。
「阿sir,我不是賊呀,你信我啦,我在xx返工,有staff card架,拿﹝連同身份證一同奉上﹞,我做得呢行,點會偷車呀?」
有警察從我手上拿走鎖匙,嘗試開鎖。我想:「如果開到,我就不用出此下策,還要給你們逮過正著,真係折墮!」此時,又來了三、四個籃帽子,把我們團團圍住,只欠飛虎隊和解放軍,還有坦克車和飛機大炮。面對如此大陣仗,我和朋友不禁相視苦笑。
「而家個問題係,你點證明架車係你先?」
「阿sir,你想我點證明呀?」
「呢個係你既問題,我點知呀!」
正當雙方膠著之際,傳來一把聲音:「開到啦!」原來之前拿走鎖匙的警察,左扭右扭,試了好多次,竟然給他扭開把鎖,真係神蹟。
「阿sir,把鎖開到,證明我們是清白的,可以走未呀?」
「走啦,快點買過把鎖,仲有,下次不要隨便帶架生出街,好易令人誤會架。」
「實會啦阿sir,我仲點敢用這把蠱惑的鎖丫!」
事後,我們各自向老婆匯報,朋友妻說,早知如此,就應該帶個女仔去,兩條麻甩,實令人懷疑啦。淘則說,應該一早到警局備案,免除後患。
一早?有早知,沒乞兒啦。
發表留言